Që në orët e para të mëngjesit të 20 qershorit, Policia e Shtetit ka kryer kontrolle të imtësishme në kampin e muxhahedinëve të MEK-ut në Manzë të Durrësit.
Kontrollet kanë ardhur me urdhër të SPAK-ut, i cili ka lëshuar edhe urdhërarreste për anëtarët e këtij grupimi.
Disa nga forcat RENEA dhe efektivët janë larguar tashmë nga kampi dhe se iranianët për herë të parë kanë ftuar brenda kampit gazetarët.
Gjatë kontrollit Policia e Shtetit ka hasur në kundërshtimin e muxhahedinëve, të cilët janë munduar të mos e lejojnë Policinë të kryejë punën e saj.
Për këtë arsye është përdorur gazlotsjellës.
Menjëherë pas kësaj, anëtarët e MEK-ut kanë protestuar për këtë vendim të Gjykatës, madje kanë pretenduar se Policia ka lënë një të vrarë dhe disa të plagosur.
Ka qenë një nga muxhahedinët, i cili në media tha se Policia ka përdorur mjete për t’i goditur duke shkaktuar edhe të plagosur.
I menjëhershëm ka qenë reagimi i Policisë së Shtetit, e cila ka bërë me dije se ka respektuar të drejtat e muxhahedinëve gjatë kontrollit.
“Po zbatojmë me rigorozitet etikën dhe komunikimin e duke respektuar të drejtat dhe liritë themelore të të gjithë qytetarëve dhe komunitetit që banon në këtë kamp”, thotë Policia.
Nga burimet e Albanian Post pranë Policisë është konfirmuar se iraniani ka pësuar atak kardiak dhe nuk është vrarë nga forcat e Policisë.
Pritet të ketë edhe një reagim më të detajuar mbi gjetjet e Policisë, apo edhe viktimën e pretenduar.
Ndërkaq, Albanian Post raportoi më herët se kontrolli vjen në kuadër të luftës kundër terrorizmit dhe parandalimit të sulmeve kibernetike.
Hetimi erdhi vetëm disa ditë pasi presidenti i Republikës së Shqipërisë, Bajram Begaj, mblodhi Këshillin e Sigurimit, ku i diskutua për sulmet kibernetike.
Sipas tij, sulmet synuan shkatërrimin e infrastrukturës digjitale të Republikës së Shqipërisë, me qëllim nxitjen e destabilitetit në vend.
Kujtojmë se Shqipëria u ndodh vitin e kaluar nën sulme të rënda kibernetike, që prekën edhe sistemin TIMS. Qeveria shqiptare asokohe tha se pas sulmeve fshihet Republika Islamike e Iranit dhe shkëputi marrëdhëniet diplomatike me të.
Po ashtu vlen të theksohet se disa ish-anëtarë të MEK-ut në Shqipëri janë hetuar nga Gjykata me akuzat e terrorizmit.
Çfarë përfaqësojnë muxhahedinët?
Muxhahedinët iranianë, të quajtur ndryshe “opozita iraniane” ndodhen prej kohësh në emigrim.
Lëvizja e tyre është themeluar në vitin 1965 dhe përfaqësojnë një miks ideologjie marksiste dhe islamiste.
Që në fillimet e tyre e deri në vitin 1970, ata kanë qenë në opozitë me ish-liderin e Iranit, Mohammad Reza Shah.
Pas përmbysjes së regjimit të tij dhe triumfit të revolucionit islamik, kjo organizatë sërish mbeti në opozitë, pasi ishte kundër organizimit shtetëror që bëri lideri Ajetullahu Ruhollah Khomeini.
Ata u shpallën të padëshiruar në vendin e tyre dhe u larguan nga Irani.
Muxhahedinët u vendosën në Irak në kulmin e luftës me Iranin, duke luftuar përkrah trupave të Sadam Huseinit.
Pas rrëzimit të Sadamit në 2003, muxhahedinët u çarmatosën zyrtarisht dhe u rigrupuan më pas në një kamp në Ashraf, pranë kufirit iranian me Irakun dhe më pas u zhvendosën në Shqipëri.
Pas vendimit të SHBA-ve në vitin 2003 për pushtimin e Irakut, siguria e tyre u vendos në pikëpyetje.
Kështu me një ndërmjetësim të amerikanëve dhe OKB-së u vendos që ata të zhvendoseshin në një vend tjetër, që ishte Shqipëria.